# ওগো হুনছো নি!

- Author: [প্রদীপ চক্রবর্তী](https://sonelablog.com/author/prodeep-chakraborty/)
- Published: 2019-11-07T12:43:00+00:00
- Updated: 2019-11-07T13:13:22+00:00
- Category: [চিঠি](https://sonelablog.com/category/%e0%a6%9a%e0%a6%bf%e0%a6%a0%e0%a6%bf/)
- URL: https://sonelablog.com/%e0%a6%93%e0%a6%97%e0%a7%8b-%e0%a6%b9%e0%a7%81%e0%a6%a8%e0%a6%9b%e0%a7%8b-%e0%a6%a8%e0%a6%bf/

---

এরে হুনরায়নি গো?  
বাক্কা কতদিন অইগেছে তোমারে দেখছি না।  
আমার জানে বড়ো আনচান আনচান করে তোমারে দেখার লাগি।  
যেমনে ঢাকা শহর গিয়া বইলায়,বউবাইচ্চার খবরও নেও না এ কি আবস্তা আরম্ভ করলায় তুমি।  
তোমার দুও পোয়া পুড়িনিতে আব্বা আব্বা কইয়া কান্দিতরা একছারা তোমারে দেখার লাগি।  
আমার বিয়ান,মাধান,আইন্জা,রাইত ঘুম নাই তোমার চিন্তায়। আর মাইনসে আমারে আইয়া যুক্তি দেইন তুমি বুলে আমারে ছাড়ি দিছো। আমি আরও মাইনসরে কই ধূর ধূর ইতা মাত আমার বাড়ির ছিটনালে মাতিও না।  
আমার জামাই ইলা নায়।  
এরে হুনছো গো?  
তোমার হুরু পুড়ি ওগুয়ে কর আব্বারে কও আমার লাগি লালজামা আনতা। আর ইবায় দিয়া বড় পোয়া আবুলে কর ও আম্মা আব্বাররে কও আমারে ভালা এগুয়া টাস মোবাইল দিতা।  
এরে ওগো এক কাম করিও ভালা মোবাইল এগুয়া দিও। তেউ তোমার লগে রাইতকুভালা বিডিও কল না কিতা যে কইন অতা দিয়ে কল দিমু। আমার জানে বড়ো টানের তোমারে দেখার লাগি।  
তুমি বাড়িত আইলে তোমার লগে ঢাকা শহরে গিয়া ফাকাইতাম আমার যে শখ। দুওজনে মিলিয়া হাতো হাত ধরিয়া ফাকাইমু। এরে এক লগে ওকলতা মনও হয় না হাতিরজিল আর যে কিতা কিতা আছে ওতাত পাকাইমু।  
গাউবায় দুইদিন থাকি চুর ডাকাইত বাড়ছোইন।  
আমার খুব ডর ডর করের। এরে হুনো যদি তোমার বেতনে কোলায় তে ঢাকাত বাসা চাইলাইবায়।  
পুয়া,পুড়িন লইয়া তেই আমরা সুখে শান্তিতে থাকমু।

ওগো তোমার বড় পোয়া ওগুয়ে আবো মুতে। আর শয়তানামী করে। কাইল গিয়া তাবিজ আনছি মেসাবর গাছ থাকি।টাকা পয়সা নিছইন না মেসাবে।  
দিন মাধান বেশ ভালা নায় তোমার পোয়া ইগুয়ে পড়াত বয় না কোন্তা না আর গাউর হতা পোয়াইনতর লগে হারাদিন বাউটামি করে।  
আর রাইত হইলে বিছনাখাতাত মুতে। বুরবুরা গন্ধ। তার ইতা খাতাকাপড় আমি ধই না। ওগুরে পারো তে ঢাকা বায় লইয়া যাও। আমি আর সামাল দিতাম পারিয়ার না। হে মাত্র কেল্লাস নাইনে পড়ে আর অতা আভঙ্গি করের আমার লগে। তুমি বাড়িত আও ধউলদি।  
আমার পুড়ি ওগু ভালা।  
কামকাজ করে আর কতাও হুনে।  
আমার আর ভালা লাগের না তুমি ধউলদি বাড়িত আও। এরে দেখছো নি কতায় কতা বাড়ে আর মতনে ঘি। লিপিস্ট,ক্রিম,পাউডার,শাড়ি আনিও ভালা ছাইয়া।  
এরে ওগো ভালা থাকিও। শরীরবায় কিয়াল রাখিও। তুমি বুড়া হইগেলে তোমারে লইয়া ফাকাইতে শরম শরম করব আর মাইনসে দেখিয়া কইবা আমারে বুড়াবেটার বউ। কিছু টাকা পয়সা পাঠাইও।  
দুইদিন হইছে মাছমাংস কাইছি না।  
চিঠি পাঠাইও আর আগামী মাসও টাকার লগে অউ যে কইছলাম মোবাইল এগু লগে দিও।  
বেশ দেরী করিও না আইও।  
আর দোয়া করিও ওগো আবুলের বাপ।  
ওগো তুমি নু আমার জানের আদাখান,পরানের ফরান।

ইতি  
তোমার একমাত্র সোনাবউ জানোর আদাখান আঙ্গুরা।

.

সিলেটের আঞ্চলিক ভাষায় হবুবরের কাছে সোনাবউয়ের চিঠি।

---

Comments: 15 — https://sonelablog.com/%e0%a6%93%e0%a6%97%e0%a7%8b-%e0%a6%b9%e0%a7%81%e0%a6%a8%e0%a6%9b%e0%a7%8b-%e0%a6%a8%e0%a6%bf/#comments